Reykjavíkurborg – Árshlutareikningur janúar – september 2020
Árshlutareikningur Reykjavíkurborgar fyrir tímabilið janúar – september 2020 var afgreiddur í borgarráði í dag, fimmtudaginn 26. nóvember.Efnahagsáfallið sem gengur yfir heimsbyggðina sökum heimsfaraldurs kórónuveiru er farið að birtast í rekstri borgarsjóðs og samstæðu Reykjavíkurborgar. Tekjur minnka og útgjöld aukast. Veiking krónunnar hefur umtalsverð áhrif á erlend lán Orkuveitu og álverð hefur lækkað með neikvæðum áhrifum á álafleiðu Orkuveitu. Mikill tekjusamdráttur hefur orðið hjá Faxaflóahöfnum og Strætó auk Sorpu bs. sökum samdráttar í ferðaþjónustu og minni umsvifa innanlands. Mikil óvissa er um hversu lengi ástandið varir og hvenær megi ætla að hjól atvinnulífsins fari að snúast aftur af fullum krafti og því erfitt að meta áhrif á rekstur og efnahag borgarinnar með áreiðanlegum hætti til framtíðar. Græna planið er viðspyrnuáætlun Reykjavíkur og gerir ráð fyrir umfangsmiklum grænum fjárfestingum sem hluta af leið borgarinnar út úr kreppunni. Um leið hafa fréttir um þróun bóluefnis gefið tilefni til bjartsýni á að unnt verði að ráða niðurlögum faraldursins á næsta ári.Rekstrarniðurstaða A-hluta var neikvæð um 792 mkr en áætlun gerði ráð fyrir að hún yrði jákvæð um 3.392 mkr á tímabilinu. Niðurstaðan er því 4.184 mkr lakari en gert var ráð fyrir. Lakari rekstrarniðurstaða skýrist einkum af lægri skatttekjum og lægri tekjum af sölu byggingarréttar en áætlun gerði ráð fyrir. Rekstrarniðurstaða fyrir fjármagnsliði var neikvæð um 2.141 mkr eða 5.471 mkr undir áætlun en áætlun gerði ráð fyrir jákvæðri niðurstöðu um 3.331 mkr.Rekstrarniðurstaða samstæðu Reykjavíkurborgar, A- og B-hluta, var neikvæð um 988 mkr en áætlanir gerðu ráð fyrir jákvæðri niðurstöðu um 11.164 mkr.
Rekstrarniðurstaðan er því 12.152 mkr lakari en gert var ráð fyrir. Lakari rekstrarniðurstöðu má einkum rekja til áhrifa lækkaðs álverðs og gjaldfærslu gengismunar vegna veikingu krónunnar frá áramótum hjá Orkuveitu. Rekstrarniðurstaða fyrir fjármagnsliði var jákvæð um 10.901 mkr sem er 8.813 mkr lakari niðurstaða en áætlun gerði ráð fyrir.Heildareignir samstæðunnar samkvæmt samanteknum efnahagsreikningi námu í lok júní 732.156 mkr, heildarskuldir ásamt skuldbindingum voru 382.054 mkr og eigið fé var 350.102 mkr en þar af var hlutdeild meðeigenda 18.953 mkr. Eiginfjárhlutfall samstæðunnar er nú 47,8% en var 49,9% um síðustu áramót.Ljóst er að rekstur A-hluta Reykjavíkurborgar verður mun lakari en fjárhagsáætlun 2020 gerði ráð fyrir. Tekjur eru að dragast saman en útgjöld eru að aukast vegna þeirra aðstæðna sem skapast hafa vegna heimsfaraldurs kórónuveiru. Samkvæmt breytingu á sveitarstjórnarlögum er sveitarstjórn heimilt að víkja frá skilyrðum 1. og 2. töluliðar 2 m.gr. 64 gr. við stjórn sveitarfélagsins árin 2020-2022. Þessi skilyrði varða jafnvægis- og skuldareglu sveitarfélaga.Opinber umræða hefur átt sér stað undanfarnar vikur og mánuði, þar sem réttmæti þeirra reikningsskilaaðferða sem Reykjavíkurborg beitir, er dregið í efa.
Reykjavíkurborg hefur alla tíð kappkostað að setja fram reikningsskil sín í samræmi við gildandi lög og reglugerðir og að reikningsskilin gefi glögga mynd af starfsemi og efnahag borgarinnar á hverjum tíma. Reikningsskila- og upplýsinganefnd sveitarfélaga birti álit nr. 1/2020 í október s.l. þar sem fjallað var um reikningsskilaaðferðir Reykjavíkurborgar. Verið er að fara yfir álitið, en stjórnendur Reykjavíkurborgar árétta að það er mat þeirra að framsetning reikningsskila borgarinnar sé í samræmi við sveitarstjórnar- og ársreikningalög og reglugerðir settar samkvæmt þeim.Reykjavík, 26. nóvember 2020.Nánari upplýsingar veitir
Halldóra Káradóttir
sviðsstjóri fjármála- og áhættustýringarsviðs
halldora.karadottir@reykjavik.isViðhengiSamstæða Reykjavíkurborgar 30.09.2020Skýrsla Fjármála- og áhættustýringarsviðs með árshlutareikningi janúar – september 2020
